阿凡達

原本唔打算入戲院睇呢部片，因爲感覺上唔會喺我杯茶。睇過預告後，更加覺得故事過於天馬行空，比較適合玩電動、網上遊戲嘅打機一族觀看。隨著電影上映一個星期後，口碑一面倒傾向推薦嘅聲音，好評如潮，甚至更估計能夠超越鐵達尼號票房。再加上友人極力推薦，嘩聲不斷； 搞到我心郁郁。結果終于抵受唔住誘惑，喺09年最後幾小時，買咗飛入場一探金馬倫呢部籌備咗14年，史上最鉅資，砸咗4億美金拍攝出來嘅最新科技作品。

30幾嵗人第一次睇3D，之前仲聼到有啲朋友話睇咗會頭暈，有啲甚至話會作嘔； 愈聼就愈跨張，講出嚟都有少少羞家。其實睇3D版最重要係揀位，最好就坐後面一啲。3D眼鏡會把畫面縮細，所以影像嘅物件相對亦會比較細啲，而且畫面會比較暗一啲。如果想較容易睇到所有場景，就唔好坐太前嘞。

整部片最爲嘆爲觀止就喺現今3D電影數碼科技嘅進步，立體技術可以講喺近乎完美，簡直可以話喺另一個視覺革命。導演將每一個鏡頭都拍攝得非常細膩同用心。單喺睇外星球上嘅生態環境，如森林、花草樹木、飛鳥、生物以及裏面煙霧瀰漫嘅效果，雖然明知喺假嘅，但喺仿真度相當之細緻，已經值回票價。

總括嚟講，倘若你唔打算睇3D版嘅話，咁呢部戲就無需入戲院睇嘞。

阿凡達官方網站