屈斜路湖.砂湯

人生有幾多個十年? 睇吓我行先定你行先,如果我行先嘅,咪我等你囖!

Thursday, November 26, 2009

向現實低頭

凡事要成功必須具備天時、地理、人和三大因素,單單靠自身嘅堅持同努力并不足夠,很多時候還要睇環境,睇形勢。倘若timimg唔啱,個人再如何堅持、幾有原則、幾有底綫; 始終都喺徒勞,敵唔過現實。因爲天上面轉咗風向,地上面嘅草木就要跟住折腰,呢個就喺生存之道。

要學會順勢而行才能事半功倍。要記住暫時嘅妥協唔等於放棄,任何時候都要裝備好自身嘅條件,蓄勢待發以便趁勢而起、一擊即中。

Wednesday, November 25, 2009

大閆生走咗

好突然,好震撼囖。每日陪伴著我嘅金波集團主席「大閆生」,昨晚因爲心絞痛而陷於昏迷,送院搶救後,於晚上7時11分與世長辭。一大朝早收到呢個噩訊,打咗嗰突,一時間未能消化。不過,換個角度睇或者係孫大人嘅福氣; 以呢種快速方式離開,總好過捱病捱痛。

人生有幾多個十年?係有生之年,做一啲自己一直好想做而唔敢做嘅事,咁樣正算系不枉此生。

親愛嘅大閆生,多謝您帶畀我哋嘅歡樂,我們永遠懷念您。

Tuesday, November 24, 2009

藝術家脾氣

佢哋對大自然嘅美特別敏銳、對藝術有一番真知灼見、對真理有獨特嘅看法,如果呢啲與世俗嘅規範起咗衝突,佢哋仲會堅持己見,咁就造成佢哋嘅特立獨行。佢哋鐘意做啲人地唔會做嘅嘢,同埋個個都係咁做嘅嘢佢哋會唔鐘意做。係我哋一般人眼中嘅與眾不同,或者係話古怪甚至係瘋子(當他還未成名的時候!)

通常話人藝術家脾氣,都係覺得嗰個人諗嘢同埋行為都以自我為中心囉,即係好似呢個世界無咗佢好似有損失咁。仲會有少少自戀,做事多數以考慮自己嘅處境為先,有少少自私兼自大咁,不過多數係一時時的,好多時只係mood到先會咁,唔係成日都係咁嘅。

Monday, November 23, 2009

生存之道

要緊記:以娘娘嘅喜愛為喜愛,以娘娘嘅厭惡為厭惡。錯嘅只會係奴才,因爲娘娘永遠是對的。

娘娘明察,娘娘英明,娘娘萬歲。

Friday, November 20, 2009

櫻花樹下




原來唔洗出門,唔洗搭飛機,都可以睇到櫻花盛開嗰喎!

其實幸福已經一直係我哋身邊,點解仲要不停咁問、不停咁去搵呢?

Thursday, November 19, 2009

HP

啱啱吃完晏,出門一刻至發覺落狗屎,唯一可以做嘅就只有一個字 - 等。系等待期間,突然睇到一樓嘅客戶服務中心有一排遮,於是硬著頭皮上去問o下; 結果得到出乎意料嘅答案。啲遮竟然係免費!絕對冇聼錯,系完全免費,任拿唔嬲。

認真要謝天謝地,天助我也。係呢個落著狗屎嘅天氣下,竟然仲會有免費嘅遮贈送,真係講都冇人信。呢啲真係名副其實嘅鬼佬大機構、大公司。

平時假如有產品要送去維修,系等待中已經有三文治、蛋糕、餅乾、冷熱飲料、無限上綱等免費招待。估唔到係落雨天仲會派送免費遮畀唔係顧客嘅街外人,真係難以置信。不旺我一直都咁支持呢個牌子嘅電腦同打印機,值得畀貴公司5粒星星。

Wednesday, November 18, 2009

秋去秋來



能夠代表秋天,除咗嗰首之外; 第一個湧入我腦海就只有客途秋恨主題曲-秋天復秋天。陳揚作曲,潘源良嘅詞再加上趙曾熹充滿秋意嘅編曲,完全散發出秋天嘅蒼涼同孤獨。

擾擾攘攘中祇想安安靜靜
偷偷的許我抹乾眼睛
我卻恨原來人生錯步永沒停
緣似是霧  悔原是命

轟轟烈烈的今已凋凋零零
捉到的不過某些泡影
我錯在從前途中裡面那一點
在那一方  於那一天

啊...秋天復秋天
相思難相見
難道這一切全是註定
啊...起點是終點
相戀還相怨
誰令這一切變遷

去去來來中祗覺飄飄零零
秋風一生作我的背景
到最後才明人生客路永沒平
情既是恨  恨也是情

情正是恨  恨正是情
情永是恨  恨永是情

Tuesday, November 17, 2009

他朝君體也相同

事常變、多珍重、水流連、風不吹

意外係網上搜尋到呢張極之珍貴合照,可惜相中人都已離世,令人唏噓。睇完今年翡翠歌聲,覺得真正嘅超級巨星真係賣少見少。

曾經為香港樂壇發光發熱嘅係四位已故歌星。每當夜闌人靜望上天上面啲星星,都會好自然諗起梅姐同哥哥當日係演唱會上講嘅嗰番説話。同時真係好希望新一代嘅所謂歌手多多向一眾前輩學習! 咪淨係溝女索k蒲D。

Monday, November 16, 2009

安全感

呢個世界有無限嘅空間,既然我哋知道,人同靈體都會四處走嘅話; 邊度有更適合自己嘅空間,就會係邊度寄居。

不同嘅空間,因為機緣巧合而生關係。 用潘生嗰句經典: 眾生在互望,但願不相干。

Friday, November 13, 2009

三毒必行



感覺上系明日之後延續篇,電影前半段確系有啲沉悶,而且故事交待得有啲模糊。仲有就系男主角同家人,炸極都唔死,好似有啲牽強囖。

整部電影長達兩個半小時,親情、友情、愛情、宗教、人性、國籍、身份、地位、環保樣樣齊。尤以特技效果令畫面為之震撼,超強視覺衝擊力; 包保睇到熱血沸騰、驚慄心跳。

人係緊要關頭勢必使出三毒自保:諗毒計、施毒咒、做毒事。因此一定要做人哋拜嗰個,而唔系跪嗰個!

總括嚟講系一部值得犧牲睡眠,非入戲院睇不可嘅高預算災難特技片。期待正版DVD推出,以作收藏。


官方網站

相關文章:
創意之選末日

Thursday, November 12, 2009

創意之選



非常有創意嘅宣傳海報,令人睇咗印象深刻,觸目驚心。一部期待已久,近年難得嘅大製作。期待進入戲院,嚟一場驚心動魄,心跳加速,血脈沸騰,天崩地裂,驚恐莫名嘅大災難。

Wednesday, November 11, 2009

唯一朋友

朋友唔系完全屬於一個人嘅,朋友應該系用嚟分享嘅; 朋友唔系一段關係嚟嘅,朋友系應該開心嘅; 朋友唔應該為咗一件事情而哭泣嘅。一個朋友系唔足夠嘅,應該出去認識多啲新嘅朋友,搵一個好體貼嘅男/女朋友去談一場戀愛。

非常贊同雨陽同Elaine所講,朋友系應該一齊分享彼此生活點滴,唔係去入侵任何一方嘅生活,亦都唔系講緊對方嘅生活係屬於另一方嘅。假如想要一個近乎全天候式去關懷,噓寒問暖又或者去分享情緒,生活,無時無刻能與你同行嘅,咁真係需要一個好貼身嘅男/女朋友正可以做得到囖,而朋友系唔可能會做得到嘅。

Tuesday, November 10, 2009

搶劫

一向唔講究吃,亦唔喜歡吃; 反而對吃嘅環境就會有所要求。假如周圍嘅環境相當污染,而且冇冷氣嘅話,即使再好吃啲所謂美食我都可以無動於衷,完全引誘唔到我。

冷氣系我基本要求,亦都系我嘅底綫。有冷氣乜都可以傾,冇嘅話就完全冇得傾!我可以唔要吃,唔要錢,甚至唔要命,勢必要有冷氣。

強奪冷氣,猶如殺人父母,天地不容!(好似誇張咗啲喔...哈哈)

Monday, November 09, 2009

沒有冷氣的日子

猶如水淹屠城,世界末日,萬劫不復也。

Friday, November 06, 2009

萬千星煇頒獎典禮2009 - 賽前預測



最佳劇集﹕宮心計
最佳男主角﹕黎耀祥《柴九-巾幗梟雄》

最佳女主角﹕鄧萃雯《四奶奶-巾幗梟雄》
(身為四奶奶幫嘅人一定要撐四奶奶撐到底!)

我最喜愛的電視男角色: 黎耀祥《柴九-巾幗梟雄》
(羅嘉良《卓一鳴-富貴門》,如果撈家簽約嘅話)

我最喜愛的電視女角色: 佘詩曼《劉三好-宮心計》
(畀楊怡《姚金鈴-宮心計》好似快咗啲)

最佳男配角: 謝天華《學警狙擊》
最佳女配角: 鍾嘉欣《宋子凌-珠光寶氣》
飛躍進步男藝員: 敖嘉年《必文-巾幗梟雄》
飛躍進步女藝員: 陳茵媺《陳寳拉-畢打自己人》
TVB.com人氣大獎: 鄭嘉穎

最佳節目主持: 美女廚房 - 鄭中基、梁漢文、方力申
(其實君如同嘉樂《星星同學會》正係實至名歸)

最佳綜藝資訊節目: 超級巨聲
最具欣賞價值大獎: 霎時感動

難道富貴門一個獎都冇??!!

Thursday, November 05, 2009

無可奈何花落去,似曾相識燕歸來

唯求達到目的機關算盡,一切美麗謊言,你虞我诈,甚至不擇手段,統統都要出齊。當今殘酷社會環境陰險逼人,唯一嘅出路似乎就系要駛出三毒:諗毒計、施毒咒、做毒事

有得揀咩?

Wednesday, November 04, 2009

可遇不可求

系你嘅,始終都會屬於你; 唔系你嘅,無論你幾執著、幾咁堅持都唔會屬於你。命裡有時終須有 命裡無時莫強求。學習去將事情以另一個角度觀看同思考,反而會有而意想不到嘅結果。

既來之,則安之。 菩提本無樹,明鏡亦非台;本來無一物,何處惹塵埃?

Tuesday, November 03, 2009

悅讀

好耐都冇試過咁享受去閲讀一本書。係一個完全冇人、冇電話、冇電腦、冇電視打擾嘅情況下,一邊聼住輕柔嘅大自然音樂,一頁一頁咁翻; 同樣嘅動作竟然可以持續2-3粒鐘。

系因爲被書中内容深深吸引著,抑或系被周圍嘅環境所影響而變得咁陶醉,咁享受呢?就連自己都搞唔清楚個中原因。點都好,咁靚嘅feel一定要好好把握,盡情咁去享受。

Monday, November 02, 2009

你當我死嘅!

有啲人假如你一直保持沉默、忍氣吞聲,佢就會得寸進尺、變本加厲; 總系以爲自己做得妥當、做得好啱;永遠都唔識得去自我反省。

須知道有句說話係,見好就收。一旦演變到過份囂張,令人忍無可忍嘅時候; 就會畀人閙到狗血淋頭,連阿媽都會唔認得!睇你肯停,肯收手未!?