屈斜路湖.砂湯

人生有幾多個十年? 睇吓我行先定你行先,如果我行先嘅,咪我等你囖!

Thursday, December 31, 2015

呼吸需要

照顧老人起居飲食確實唔喺一件易事,有時絞盡腦汁卻換嚟一句唔肚餓,咁就擱置。時刻要提高警覺,注意𠳔身體有任何變化,失足跌倒就不可收拾。

不過呢一切都唔及一個非常難熬嘅行經,就喺清晨4-5點起身!!!搞到睡眠質數每況愈下,再咁落去唔喺辨法。難道真喺要出動到安眠藥?

講老實真心唔想活到咁大年紀,冇能力自顧行動不便之餘,如果有病痛就仲麻煩兼頭痛。睇住身邊嘅朋友親人一個一個咁走,自己留喺度為咗啲乜?每日重複起身食飯瞓覺,為嘅只喺呼吸,仲可以做咩?

(唔喺要投訴啲乜,純粹只想喺度發洩吓情緒啫)

Saturday, December 26, 2015

成長

好多嘢無論時間過咗幾耐,都唔會從腦海中消失,永遠都會留喺記憶中。隨住年紀逐漸增長,發生喺自己身上嘅事情亦逐漸繁複。

有啲事情以前一直都以爲喺“大人”至會去做嘅,今時今日好自然咁落喺自己身上。突然間要落好多決定,當中冇人會從旁勸導或指點,一切都由自己去取決,自己去負責。
無形中好似感覺突然長大咗,好多嘢唔可以話想點就點,這就是所謂嘅“大人”。。。 。。。

Tuesday, December 08, 2015

瘋了、累了、痛了、笑了、叫了、走了

還記得以前每隔一段時間,湊夠大約18-19首歌曲就會拿去唱片鋪到錄歌。有啲歌太長仲要絞盡腦汁唸要揀飛邊首歌,然後就不斷咁打點話去查詢進度,一好咗就第一時間奔往去拿帶。可能以前聼得歌多,慢慢就養成對音樂觸覺特別敏感,一旦聽到有一粒音唔喺咁順,都會好容易被發覺。

通常我都會因應唔同嘅情緒而選擇聼邊一位女歌手嘅歌曲; 例如:

  • 心情煩躁到極點嘅時候,我會聼莎莉嘅歌
  • 心情好有mood嘅時候,我會聼王菲嘅歌
  • 心情好靚開心嘅時候,我會聼憶蓮嘅歌
  • 心情好攰眼瞓嘅時候,我會聼鄺美人嘅歌
呢一刻 嘅心情我想聼阿菲嘅致青春

Friday, December 04, 2015

一線之差

好多所為嘅有錢人都會買大屋坐靚車; 不過因為生活繁忙應酬多,留喺屋企嘅時間少之又少;自己揸車更加可以講喺機會渺茫。

因此間屋幾大都喺買嚟俾工人住,房車幾舒服都喺買嚟俾司機揸嚟載工人去買餸,接仔女返學放學。

呢個年代似乎做工人都幾唔錯,有大屋住又有靚車坐,仲有司機管接送,何樂而不爲。

Thursday, December 03, 2015

通病

發覺愈來愈多人機不離手,連同人交談中都一直喺度篤篤篤。究竟知唔知乜嘢叫禮貌同尊重?

既然咁唔想講嘢,倒不如唔好約見面,直接互通訊息了事,咪一了百了囉。

當遇到呢種人我會不發言,拿出耳筒全程聽歌,就算對方想交談我都會當𠳔透明,十問十唔回應。你可以篤電話我唔可以聽歌咩?

呢招一出對方通常都會醒目將電話收起。以其人之道還治其人之身就喺咁解啦。

Wednesday, November 25, 2015

一花一淨土

2015年11月對我嚟講喺一個又忙又唔開心嘅一個月份。繼月頭啱啱搬完屋,洗咗一大筆之後都仲未安頓好,上個禮拜三就接到噩耗要趕返屋企奔喪。

收拾遺物唔喺一件容易嘅事,一件又一件嘅物件都會勾起好多回憶以及叮囑。喊完又再喊,眼淚抹乾咗又再流,不斷循環。直至今日心情依然未能完全平復; 不過離開屋企接觸唔到啲物件,始終感覺好過啲。

無論時間長短,我知道呢種傷痛永遠都唔磨滅,心中不斷呼喚阿彌陀佛帶領到極樂淨土,長埋於彼岸花中安息。

2015年突然間變得好唔一樣。。。 。。。

Tuesday, October 20, 2015

劫後餘生火星版

一個人嘅獨腳戲好多人都接受唔到,再加上以外太空為背景嘅科幻劇情片,本人就對呢類戲種情有獨鍾。

有人話,凡喺達到神級演技嘅演員,都要有一齣由頭到尾都喺一個人演出嘅電影。相信呢一部應該都會喺Matt Damon推上神台嘅代表作。

Wednesday, September 30, 2015

小呀小蘋果

當人人都傾向大mon嘅世代,本人依然終於教主當初意願。
上個拜五下定決心,購入第四粒放得入褲袋嘅蘋果。

 相關連接:蘋果進化

Saturday, September 19, 2015

變換的世界在轉

又要搬屋啦,浮浮沉沉大半世人搬咗幾多次?連數都提唔起勁去回想。

唯一嘅可以做到嘅就喺好好咁處理好自己心理嘅關口,一切隨緣。

Tuesday, September 08, 2015

聼天由命

既然唔喺自己控制範圍内,就算擔心亦於事無補。 唔想再去探究因由,終日提心吊膽,放手就喺目前最佳選擇。

嗰天想點安排就點,一切順其自然,既來自則安之。

Tuesday, September 01, 2015

我喺馬來西亞人


呢一個版本喺我由細到大聼過最感動,最引以爲傲嘅一首國歌。
向所有出席嘅勇士們致敬; 因爲有你哋令我可以好驕傲高聲咁講 :
“我喺馬來西亞人”

Friday, August 28, 2015

心理準備

雖然心中唔想發生喺自己身上,但喺現實始終喺殘酷。既然上天要考驗自己,唯有將做咗咁多年人,一直以嚟所學習到嘅耐心、諒解、容忍、寬恕、接受等等去面對呢次嘅考試。

唔敢奢望會考到甚麽好成績,祈求一切順利,無風無浪平靜咁通過呢一關,已經心滿意足。

Sunday, August 16, 2015

紅茶館


趁有四日假期又唔洗拿年假,終于嚟到呢道食件蛋糕嘆返杯下午茶。


人愈大追求嘅嘢就愈簡單

一本書,一杯茶,一件英式鬆餅,一個下午。

Tuesday, August 04, 2015

戀愛中的城市


睇到呢段預告片,令我有種想家嘅感覺。北海道~"I'll Be Back"!!!

Friday, July 10, 2015

回憶是紅色天空

屋企部腦愈嚟愈少空間儲存檔案,於是翻一翻裏面啲文件夾,結果發現大量從2011至2015年嘅照片同錄影檔案。因爲一直推辭,裏面啲相日復日,年復年咁堆積咗五年。睇嚟喺時候要立定決心做過打掃除,逐一將佢哋歸類同制成影片,做個了斷。

下半年嘅目標,12月31日前一定要完成,Fighting!

Thursday, July 02, 2015

伊藤久由衛門

 
突然間非常懷念宇治伊藤久由衛門總店裏面一系列嘅抹茶甜品同小點。嗰一股濃郁嘅抹茶香味,至今依然令人難以忘懷。

如果有機會再重游京都,一定要揀宇治呢個抹茶原產地留宿; 慢慢咁去一一品嘗所有啲抹茶產品,實行有殺錯冇放過。

Sunday, June 28, 2015

離開橄欖樹,來到菩提樹

4月兩篇,5月一篇,恐防6月破紀錄連一篇都冇,所以今日就喺咁已發篇文上嚟,撐撐場先。


上個禮拜去咗香港一趟,整個行程只有一個字形容:熱。從相中睇到藍藍嘅天空,就可以想象到當時氣溫有幾高; 熱日當空下喺戶外行足大半日,真喺難以想象自己嗰一股毅力同堅持。

慈山寺除咗嗰座雄偉嘅觀音菩薩像之外,就要數大雄寶殿前嗰四棵菩提樹最爲吸引。 因爲每個人心中都會有一棵自己一手栽種嘅菩提樹; 長得茂盛與否就只有自己最清楚。

Monday, May 25, 2015

反效果

語音留言都已經夠煩,仲搞埋電話通訊。所有來電本人一概都唔會接聽,每個月得3GB數據,仿似戒毒癮一樣難熬,再接埋電話條數咪好襟計?


祈求有朝一日可以閂咗個語音同埋電話功能,咁就天下太平落得清閒。

無論你打一千一萬次都只會徒勞,有事請短訓,多謝合作。

Sunday, April 12, 2015

禮儀廉恥

究竟仲有幾多個人懂得乜嘢喺禮讓?家陣啲人乜都要爭,乜都要搶?做乜啫?等下一位會死人咩?讓吓人會天崩地裂咩?畀你爭到搶到咗又會點?會飛咩?

禮讓就好似天山雪蓮一樣,變得遙不可及。

人類=可悲





Wednesday, April 01, 2015

金嘆與車恩尚


最近被佢哋兩個搞到到啲時間顛倒曬,原因就喺我依然保持一顆赤子之心。

Tuesday, March 31, 2015

醒吓啦

當大部份人都覺得佢喺一位偉人,好惋惜佢嘅離開嘅時候; 我反而喺心中盤旋,需要咁做咩?做得如此明顯,背後冇其他因素存在?你哋真喺會相信架?

喺我睇得太過深入抑或你哋過份天真呢?你哋會唔會做多咗啊?

Monday, March 30, 2015

奥飛騨温泉郷


嚟日本當然要温泉啦,今次呢個喺海拔1283米處,
奧飛彈溫泉鄉中最古老,歷史最悠久嘅平湯溫泉。

眼前雪景猶如仙境般幻似真,此時此刻將永遠留喺腦海入面。

選擇呢間酒店除咗價錢適中之外,當然就喺被佢哋呢個露天風呂所吸引。

喺漫天飄雪零下?度下温泉,可謂人生一大樂事。
一個人獨自喺度沉澱,即使有幾多煩惱,瞬間亦會變得寧靜平和。

Thursday, March 19, 2015

最美麗的第“六”天


一直都好想過年去旅行,今年喺無心插柳下完成咗呢個多年嚟嘅心願。

其實想像同現實喺兩回事,一邊要籌備過年所有零零碎碎事情,另一邊要計劃好行程時間表等; 所有嘢堆曬喺一齊,每晚攰到一上床就即刻瞓着。

2008年因爲凌加恩認識高山呢個地方,結果終于可以如願以償,能夠親身去到拍攝場地親歷其境,感覺就好似發夢一樣。

感謝上天嘅眷顧,讓我哋今趟整個旅程順利到達所有原定計劃好想去嘅地方。喺屋企咁嘅情況下,容許我可以再任性多一次。

感恩的心 感謝有你 伴我一生 讓我有勇氣作我自己
感恩的心 感謝命運 花開花落 我一樣會珍惜

Tuesday, March 17, 2015

伊藤久右衛門


雲雲宇治綠茶當中,唯獨鍾愛呢個品牌,無法自拔。

Monday, March 16, 2015

廉價航空

唔記得由幾時開始對廉價航空大打節扣,對佢哋嘅印象亦每況愈下。其中最令我心死就喺寄艙行李,買機票嘅時候標榜住有幾平有幾抵,到咗購買行李嘅時候就打開殺價,好冇專業操守囖。

不過最令人懷疑嘅就喺機師嘅專業資格,尤其喺繁忙時間或誤時嘅情況下; 莫講話檢查冇完成架機就即刻起飛,就連啲機組人員未點好人數就落閘放狗,話曬都喺百幾二百條人命,可唔可以認真啲啊! 唔喺一個平字就乜都唔洗做喺嘛?!

最後就喺啲無腦嘅人,講到明起飛降落嘅時候熄電話,點解仲喺有啲腦殘人士,依然當聼唔到喺到篤篤篤。大姐大哥,你不顧自身安危,都唔做拖衰家啦,唔該曬。

Saturday, March 14, 2015

博客大賞

每次當我心煩躁嘅時候,就會收到呢份驚喜即時令我心情平復。
連續四年都能夠有幸得到呢個獨一無二嘅自製CD,
除咗感到窩心之外,亦證明人間依然有情。
衷心一句~多謝
盼三年
感恩大賞

Friday, March 13, 2015

魚生

今年可謂一波未平一波又起,因此連撈生都冇興致。
年30第二撈 (第一撈因爲太餓,結果忘記影低)

年初二第三撈,亦為今年最後一撈,少得可憐。

初七仁日第四撈,人在高山沙律當魚生撈 (咁都算撈生褂)。

Wednesday, March 11, 2015

食得其所

屋企一直都有一個習俗,就喺每年初一都會食齋。
因爲媽媽年事已高,呢個任務好自然咁就落喺我身上啦。
今年嘅南乳齋味道唔錯,好快就被掃得一乾二淨。

另外就喺呢個吾淑吾食推薦嘅蘋果陳皮湯,
甘甜得嚟又相當滋潤,最啱就喺大魚大肉之後整返碗;
最起碼心靈上感覺平衡啲,罪惡感都少啲。

Tuesday, February 17, 2015

生日快樂


四十嵗生辰,百感交集,思緒萬千。

Sunday, February 08, 2015

Wednesday, January 28, 2015

傻女


呢個版本嘅傻女,簡直令人喘唔過氣;
聼到最後10秒,我已經忍唔住: 嘩哈哈哈哈哈哈~~~
好嘢!

Saturday, January 24, 2015

見面禮

2015年頭就送咗份大禮過嚟; 病咗成個禮拜。到咗今時今日依然冇乜胃口,精神依然恍惚,終日魂游太虛,都唔知自己到底做緊乜。

喺啲咳藥水太勁抑或喺抗生素過強呢?已經唔想去尋求箇中原因,一心只喺想快啲康復,過返啲正常生活。

人老咗就真喺要認命.... ....

Saturday, January 10, 2015

不要害怕


死亡喺人生必經,當我哋真正認識佢了解佢嘅時候,其實無須過於害怕。一切冥冥中自有安排,既來之則安之。

親人離開我哋,傷心喺必然,畢竟我哋都喺凡人。 將所有情緒發洩曬出嚟之後,就喺時候收拾心情,繼續我哋嘅人生,好好咁活在當下,珍惜身邊依然陪伴緊自己嘅家人,朋友。

因爲,活著就是完全無可比的精彩。