屈斜路湖.砂湯

人生有幾多個十年? 睇吓我行先定你行先,如果我行先嘅,咪我等你囖!

Thursday, March 28, 2013

雪梨燉川貝

因爲久咳未愈,經前輩教路,不妨清燉此湯一試。此湯清熱化痰、止咳平喘,性質微寒,適合熱性體質人士日常服用,正正吻合出生於冬天嘅我。

材料:
雪梨一個
川貝末一錢
冰糖適量
南杏北杏少許
雪餌適量

首先將雪梨洗乾淨、去皮去芯、切塊,將所有材料放入燉盎內,加水蓋好。然後隔水慢火燉約2至3小時,即可食用。

Wednesday, March 27, 2013

後會有期

人網要執笠,唔係因爲經營不善,唔係因爲營運資金不足,唔係因爲人士變動,唔係因爲被大財團收購,純粹因爲政治因素,要係短時間内閂門大吉。

老實講,一個越做越好嘅網台,每日伴隨著我已經幾個寒暑,突然間話要執笠,心底裏面的確覺得好可惜同有啲唔捨得。

不過正所謂天下無不散之宴席,好多嘢都係冇永恒嘅。唯有盼望來日能夠再重遇,雨後仍然有陽光。

香港人網 敢講 至好聽!

Tuesday, March 26, 2013

接點

家陣出席囍宴,都會少不免被啲親朋戚友問,幾時到你啊?幾時有另一半啊?幾時結婚啊?等等千篇一律重復嘅問題。講老實由開始時覺得厭煩,直到今時今日已經好似變咗免疫一樣,完全冇到感覺; 就當喺閒話家常一樣普通。

其實結婚與否真係咁重要咩?今時今日睇住身邊認識嘅人結完又離,離咗又再結,尋尋覓覓咁就過咗半世人。另一單仲慘,終日為一家幾口奔波勞碌,搞到欠債累累,最後選擇自盡英年早逝,剩下孤兒寡婦,睇到都心酸。

其實唔應該為結婚而結婚,啲乜嘢年齡障礙,老咗有兒女照顧,老咗又乜乜而結婚,統統都係自私。結婚應該按部就班,一步一步嚟; 緣份若果敲你嘅門,你擋都擋唔住。

女:世界上嘅人咁多,如果我有接點認識好多人,我就能找到跟我契合度百分之百嘅男人。
男:如果世界上有跟你百分百契合嘅人,但你卻搵唔到他,亦代表佢並不係你嘅真命天子。

有接點,正有可能; 如果冇接點,就不係是100%。

Monday, March 25, 2013

爆炸糖

唔該各位糖果哥哥姐姐高台貴手,唔好再發邀請畀我,加入你哋嘅糖果陣容好嗎? 呢個讓人失心瘋,廢寢忘食,猶如病毒一樣入侵腦細胞,操控著各人嘅時間,搞到周圍甜到惹蟻。 家陣仲要我每日不停咁拒絕你哋啲邀請,真係睇到都煩!

本人再次在此聲明,唔中意食糖亦驚中甜尿,懇請各位停止派糖畀我。

多謝夾承惠,真係唔該曬!

Friday, March 22, 2013

ゆっくり ゆっくり

炎炎夏日再次重溫呢部日劇,依然令人感覺舒暢。劇情冇太大嘅起伏,就如主題一樣,慢~慢~來。



此刻嘅我正需要呢種清涼嘅感覺。慢舞、慢活,順其自然,悠然自得咁生活。

Thursday, March 21, 2013

你有你的人生,我有我的旅程

有種人每當去到商場或者一個新鮮嘅地方,就會四圍東張西望; 務求要係短時間内遇到熟悉嘅面孔,然後上前同對方搭訕。

而另一種人每當去到商場或者一個新鮮嘅地方,都會肆無忌憚心情放鬆; 主要係唔想遇到熟悉嘅面孔要去打招呼,破壞咗行街嘅雅興。

有種人中意約埋一大班朋友,一齊吃喝玩樂,熱熱鬧鬧。

而另一種人中意三五知己,一齊聚舊談天説地,噓寒問暖一番。

人有好多種,有人中意咁但有人卻唔中意咁。冇話對與錯嘅,只要大家唔好勉強大家,各自各覺得舒服咪冇問題囖。

Wednesday, March 20, 2013

獨角戲

絕對唔容易做,無論出場,走位,搞氣氛,中場轉入高潮至到尾段落幕都喺靠一人支撐,完全冇對手交戲。場戲做得好與壞完全靠曬一個人,最慘嘅就喺每場戲都冇劇本,以飛紙仔形式喺最後一分鐘嚟繼續演繹下一場戲。

無論點都好,我始終明白做得岩未必有獎,做錯就一定有罰呢個道理。

Tuesday, March 19, 2013

我唔撈啦

呢封辭職信的確將所有積勞多時嘅氣一吐為快!
幾時輪到我有咁嘅機會,吐氣揚眉?

Monday, March 18, 2013

呢度搭的士

上到的士啲司機一定會問乘客行邊條路綫,一大論乜p乜p收費公路名之後,又問行乜乜高速公路。有啲更加離譜問你點去,往邊個方向!!! 真係把x火,大佬啊我鬼知道行邊條路咩? 如果我知道點去就唔洗搭的士啦! 問問問!

有時我會答: 行冇塞車,最快到達目的地嗰條路綫,唔該曬!

Friday, March 15, 2013

講完

每當某某將照片上載到面書,又或者講有關佢哋公司裏面嘅事情; 點解我完全領悟唔到佢哋所講嘅喺一種分享或者喺發牢騷。反之有時會覺得佢哋只係純粹想炫耀自己有幾威水,公司畀佢幾多花紅、啱啱又同老細去食咗乜乜大餐、老細幾咁起重佢派佢去邊邊度公幹、有幾咁巴之閉咁。

最明顯嘅例子之一就係當佢哋放完假返嚟,就會一直係到滔滔不絕咁描述佢哋嘅一點一滴。去過邊食過乜,仲畀埋相你睇一邊講解。呢種叫做分享喜悅同經歷,我完全十分理解而卻相當認同,亦非常樂意去聼你或妳啲經歷以及欣賞你哋嘅照片。

但係當換轉喺我去完旅行返嚟,而你又問起我“玩得開心嗎?”; 咁理所當然會好想去分享一啲發生過嘅趣聞趣事。 對方態度竟然嚟個360度轉變。一副唔耐煩嘅樣之餘仲要好敷衍咁應你幾句。假如你畀相佢哋睇仲離譜(當然係對方問我至會畀佢哋睇),翻兩嘢啞口無言咁遞返嚟,無動於衷。好似搞到我喺度向佢曬命咁,真係把鬼火。

點啫?你哋講我就要聼,難道我講嘅時候就係發噏瘋?最火滾就係又要問口爽,到你講緊之際佢竟然係度玩電話?#*%%#*……Q—*·%#)點解我要去應酬你哋吖?呢種人一於當佢哋死嘅,講乜都唔需要聼,電話亦唔需要接,連見面都免得就免,最好就喺各行其是,互不相干。

完。

Thursday, March 14, 2013

音樂殖民地


又有新歌派台,黑膠>捲帶>CD>MD>MP3>?

發佈時間:2013年03月13日
音樂殖民地
主唱:C AllStar

作曲:賴映彤@groovision
填詞:梁栢堅
編曲:賴映彤@groovision
監製:簡

有個洞穴人 敲打出聲音
過後 來到某個世代有一人
留聲機 關起跟釋放了聲音
聲軌雕刻聲音 音波都流痕

再過數十年 卡式帶出新
以後 迷上聽眾有十數億人
磁帶粉 一轉眼滿街walkman
CD一出生轉眼變discman

CD再生MD
再進化MP3
再進化哪裡 哪個知

再見 我們道別聽覺圖騰
轉眼變細變塵 微塵再出靈魂
留聲機 聲音可鎖緊 可惜聲音不留人
再見 往日旗艦店眾人民
數碼半秒震憾 直入耳膜元神
來聽真
今天的聲音 響遍世界 過後十萬代傳真

我最快樂時 一屋的CD
這日 聞訊老店也沒法堅持
留青史 黑膠那唱針終止
捲帶捲走AB終結到CD

YOUTUBE 再加 facebook
聽歌的新定義
再進化哪裡 哪個知

再見 我們道別聽覺圖騰
轉眼變細變塵 微塵再出靈魂
留聲機 聲音可鎖緊 可惜聲音不留人
再見 往日旗艦店眾人民
數碼半秒震憾 直入耳膜元神
來聽真
今天的聲音 響遍世界 過後十萬代傳真

再見 世人迷途聽覺羊群
轉眼變細變塵 微塵再出靈魂
留聲機 聲音可鎖緊 可惜光陰不留痕
再見 昨日洞穴那個猿人
數碼半秒震憾 直入耳膜元神
來聽真
今天的聲音 響遍世界 過後十萬代傳真

Wednesday, March 13, 2013

老化

  1. 皮膚越來越失去光澤、
  2. 歲月的痕跡
  3. 脫髮煩惱
  4. 視力變差
  5. 嗅覺味覺降低 
  6. 免疫力降低 
  7. 口腔粘膜萎縮 
  8. 唾液分泌減少
  9. 血壓上升 
  10. 肺功能降低 
  11. 基礎代謝率減少 
  12. 骨頭密度減少 
  13. 肌肉組織減少 
  14. 睡眠時間減少 
  15. 記憶衰退 
仲有仲有....真喺愈寫愈多,愈嚟愈令人毛骨悚然~~~

Tuesday, March 12, 2013

令我敢飛向夕陽


完全是你風中歌唱,長路中照亮,令我敢飛向夕陽。
完全是你,我可感到天真的往年能在你臂內重遇上。
如沒有你,如沒有真的愛上。

Monday, March 11, 2013

2012 C AllLive 演唱會


三月份傾城投入於C AllLive 演唱會,曾經讓我們窩心同流淚的歌
四個熱愛音樂嘅小伙子,值得支持!

DVD Disc 1 (LIVE)
01. Overture + 我們的胡士托
02. 切膚之痛
03. 白色信件
04. 小王子 / 我們的電車上
05. 別讓小島沉沒 / 傾城
06. 馬爾代夫
07. 新預言書 / 巴斯光年
08. 2013的約定
09. iSing
10. Sweet medley 喜歡你 / 一生愛你一個 / 喜歡喜歡你 / 喜歡你是你 / 尋開心 / 吻感
11. Sad medley 假如讓我說下去 / 幾分傷心幾分痴 / 餘情未了 / 祝君好 / 不拖不欠
12. 我的快樂時代
13. 時間囊
14. 「星投大戰」後傳: 小城大事 / Against All Odds / 如果沒有你 / 陀飛輪
15. 陀飛輪 (winning song)

DVD Disc 2 (LIVE)
01. 不知不覺已大個
02. 給自己的信
03. Last Day
04. 年少無知
05. 少數
06. 命硬 (側田/C AllStar)
07. 很想很想說再見 (側田)
08. 大同 / 無心睡眠
09. 80後時代曲
10. 我們的胡士托
11. 天梯
12. 從當天到今天

Bonus Tracks:
01. 切膚之痛 MV
02. 少數 MV
03. 下靶 MV

C AllStar 音樂成長印記 從街頭到九展Star Hall舞台 唱功全展示
“2012 C AllLive” ( 2 Live DVD + Karaoke DVD + 2 CD )

首批 特別版 除加送Karaoke DVD
另外Live DVD特別收錄3首Bonus MV “切膚之痛” “少數” 及“下靶”
DVD - HD全高清1920 x 1080拍攝
Dolby Digital EX 5.1 / DTS- ES

Friday, March 08, 2013

人在江湖

以前覺得啲人好無聊,點解要將啲工作帶返屋企做?即唔可以完全放鬆休息之餘,又將啲壓力延續係屋入面,相當愚蠢。

隨著時間洗禮,自己竟然也落得同一下場。 不約而同咁將啲工作帶咗返嚟屋企做; 中飯時候仲要回老細短訊兼報告行蹤。

腦海裏面突然不斷咁問自己,點解突然間會落得如絲田地?

真喺身不由己,不能自如。

Thursday, March 07, 2013

踩狗屎

傷風感冒未痊愈,左眼竟然無啦啦紅咗; 啲微絲血管爆曬紅,但係又唔痕唔痛。結果梗系要拿病假,乖乖地留係房間裏面,以免再受感染。

呢排都唔做乜,過完個年返嚟就不斷咁病; 去診所好似去shopping咁。

莫非真係踩到狗屎?!

Wednesday, March 06, 2013

戀愛季節 - 春之章


呢首洋蔥真係越聼越好聽,加上春芬同施辰嘅幽默演出,
感覺溫馨兼有趣。春天就係應該輕鬆吓,開心啲~~~

Tuesday, March 05, 2013

地盡頭

我深信所有嘢都有配額(即係quota)。因此無論食嘢同做人都好,千奇唔好去到咁盡,要留一綫餘地。Quota 一旦用盡就恨錯難返,永不超生。

所以亦無需要去羡慕別人,因爲今日佢得到嘅唔代表他日佢能夠擁有。可能配額超支,他日要雙倍、三倍甚至倍上一生去奉還。

要學習知足,要懂得放手,凡事適可而止。

Monday, March 04, 2013

醫生喔!!!

最近睇醫生好似睇上癮一樣,連續兩個星期都發燒,好似燒上腦咁,懵懵懂懂。

啲所謂醫生就淨係識得開埋啲抗生素; 當然我硬係全部都冇食到啦。假如真係聼聼話話咁食曬啲葯,睇怕我嘅病未痊愈,我嘅肝同腎都已經做到虛脫囖。

求人不如求己 ,唯有生生性性;  戒口之於每晚10點乖乖上牀瞓覺。

Friday, March 01, 2013

晚霞

默默望著晚霞,心情非常忐忑。
仿似蝴蝶,飛得了跑不了,
謝了花瓣換到蜜糖。。。。。。