時光本是無罪

前幾日系郵箱裏面收到一封由Geocities寄嚟嘅電郵，宣佈將會系10月26日正式暫停提供所有免費製作個人網頁空間。換句話講，昔日所有寫嘅遊記都會無一幸免，統統要斬！

建於2000年5月1日嘅個人網頁，取名為海市蜃樓。第一代嘅海市蜃樓相當雜亂；有電影推薦、生活點滴、當然唔少得有關葉蒨文嘅一切，乜嘢都有齊； 整個網頁冇一個統一嘅概念。同時亦因此激發到圖書館去借一啲有關製作網頁嘅書籍做參考，學識咗HTML CSS JavaScript語法，開始嘗試自己去寫HTML。

直至2002年去完南韓旅遊返嚟，好想把開心嘅遊歷同一啲難忘時刻全部寫低。所以把整個海市蜃樓翻新，主力係選寫遊記，一為保存紀錄，亦為娛人娛己。更為老咗可以回憶，因爲怕自己患上老人癡呆嘛！

2003年葉蒨文全面復出，同時間馬不停蹄製作咗另一個完全屬於你、屬於我，完全係屬於葉蒨文嘅小宇宙。

兩個放咗相當長時間同心機去經營嘅網頁，隨著呢封電郵亦即將宣佈暫停服務。唯一慶幸嘅係，自己一直都有備用資料作後援嘅習慣。倘若日後心血來潮，要將兩個網頁從新上載到另一個司服器，都唔算係一個大問題。

時光本是無罪，冇嘢係可以永遠。因爲變幻原是永恒。