廉潔聚餐

428嚟一個廉潔嘅餐聚，感覺自在幸福。
開心就喺如此簡單！

保留

之前已經提及過，其實我唔係咁喜歡將自己嘅部落格同面書地址畀啲相識嘅親戚、家人以及同事。再者我亦唔會喺相識嘅朋友裏面推薦或叫人去自己嘅部落格同面書裏睇嘢。因爲呢兩過所謂嘅平台，都實在太過公開； 所以我一直都純粹以發洩同娛樂嘅態度嚟看待裏面啲内容。

至於點解唔想公開畀啲相識嘅親戚、家人以及同事，完全喺因爲呢個範疇裏面嘅人，通常都係熟悉而又以熟買熟，打爛沙盤問到篤嘅，倘若你post少少嘢都會大驚小怪，驚天地泣鬼神。

更加強調嘅就喺同事，呢個group嘅人就更加唔可以畀佢哋知道你任何事情、近況以及與其他人嘅關係，全部一概絕緣。因此如果有同事開到口，問咗4-5次要加我入面書，我通常都會拖字決，然後加對方入我嘅特別過濾名單裏面。 往後一切發貼、圖文都過濾曬，永遠都冇可能睇到。冇圖睇、冇近況update，冇嘢tag，冇活動，一於做個活生生嘅植物人面書戶口，吹咩？！

虛無飄渺

呢首「Falling」充滿咗迷幻，低音結他Bass增添詭譎嘅氛圍，深夜裏聽起嚟更加彌漫住慵懶與虛幻之中。

似有還無，疑幻似真...好飄~~~~

阿門

異國情緣一直都唔被睇好，更何況喺一段孽緣。不過假如雙方都不在乎天長地久，而能夠喺有生之年嚟一場轟轟列列、刻骨銘心嘅戀愛，未曾唔係一件好事。

永遠回頭有最好，推翻現實是殘酷。祈望你像耶穌基督收我這門徒，來默化潛移我新生愛比天高。

黑夜不再來

估唔到搬嚟養心殿之後，下官竟然可以重溫想當年啲日子。咁嘅時候都能夠上嚟抒發心情，實在太太太太太太驚喜啦！

霎時間落得清閒，感覺有點兒唔係好習慣添。希望往後嘅日子都可以咁就好囖，起碼可以專心去完成手頭上嘅公務，唔洗忙到連上茅廁嘅時間都冇。

風水果然會輪流轉，黑夜已經過去，黎明還會遠嗎?！

天氣這麽熱

周末炎炎夏日 （起碼有34度以上），最好嘅活動就喺瞓返個晏覺。
難得可以無所事事，梗系有咁懶得咁懶。一於乜都唔做，淨系做一樣嘢 - 就系HEA!!!

如火如荼

一切整裝待發，一旦公開確實日期，就要開始還債。

明星

點樣正叫做明星？點樣正叫做唱歌？

講多無謂，用你未盲嘅一對眼睛睇清楚，用你未聾嘅一雙耳仔聼清楚！

多謝您哋曾經為呢片星河閃耀燦爛過，我哋永遠都會記住你哋，永遠懷念你哋。

梅艷芳 張國榮

吻下来 豁出去

既然通唔過本地電檢局，唯有喺呢個暫時仲算係自由嘅網絡世界裏面，公諸於世。

其實我真係唔明白，點解需要剪咗去？？？ 有嘢咩？！

愛與痛的邊緣

每日都要等、逼、擠、推正可以入到車廂，而且包保你可以充分鍛煉到一身好嘅腳骨力，仲可以同時一邊搭車一邊做桑拿。近呢幾個月更升格到為普儸大衆訓練EQ同守時，因爲無論你提早幾多分鐘，包保有遲冇早安全送到大家到達目的地。

生活喺一個如此高質數又超水準嘅環境中，心情自然會靚啲，皮膚會光滑啲，人都會長命啲！

等到花兒也謝了

日本有櫻花，呢度有賤過地低泥嘅不知名甩色叢葉

韓國有楓葉，呢度亦有超級野生嘅不知名紅葉

重返鐵達尼號

無心插柳之下竟然咁啱喺沉船100年嘅今日，再次進入戲院睇咗呢套曾經瘋魔一時嘅經典電影3D版。 其實啲劇情，場景同對白都已經了如指掌，但喺到咗某啲場景，聼返某段對白依然被感動，心裏面閒中都會慼慼然，眼眶發熱。

老實講，與其話係3D版倒不如話係修復版比較貼切。畢竟都係15年前拍下，金馬倫就算係首個人類成功潛入海洋最深處，好多場景點樣攪盡腦汁都無法突破到3D效果。因此千奇唔好期待沉船嗰時，啲海水會沖向到你面前，甚至會延伸到可以觸手可碰嘅視覺效果。

至於今次呢個Rose三點不露嘅保守版，整體嚟講都喺值得再次揞荷包入戲院，欣賞裏面多場震感嘅大場面、振奮人心嘅電影配樂同裏面好多嘅經典對白： “You Jump I Jump, right?” and "To make each day count."

2012年4月14號晚上11時40分： 船側以20.5節的航速向55~60英呎嘅冰山擦身而過
2012年4月15號淩晨2時20分： 鐵達尼號嘅船尾部分在水面懸浮了一會，便緩緩地在水面消失，1500人隨著她嘅消失而葬身大西洋中。

相關貼文：
鐵達尼號 2 ???
鐵達尼抵新
永遠的鐵達尼號

敬禮

透過蘋果動新聞嘅推薦，下載咗Instagram嚟玩。估唔到攝影白癡都能夠影出呢種效果同水準出嚟。

佩服現今科技進步，更加要佩服一代傳奇人物 - 蘋果教主。

宮嘯

估唔到印尼大地震竟然會震到嚟宮中，連日嚟兩位娘娘互相鬥法，各處奇謀。最後下官被譴派到養心殿為皇爺效勞，果然喺柳暗花明又一村。

無心插柳之下，竟然可以脫離爾虞我詐嘅后宮是非地，堂堂正正咁協助皇爺辦理日常政務。今次多得兩位娘娘鷸蚌相爭，下官正可以逃出生天，能夠依稀睇到一絲曙光，還得神落。

這麽遠、那麽近

門前有一條小河，遠處有人係河中捕魚，河邊有牛群係翠綠嘅草地上悠閒地食緊草。 原來如此簡單樸素嘅一個景色，喺呢個鋼筋森林裏面竟然會喺遙不可及。

唔記得從幾時開始已經將呢一切遺忘咗，直到某日睇返呢個情景，至真正察覺已經離開太遙遠，回頭已是百年身。

人往往就喺要到失去咗正懂得珍惜。

雲海

清晨飛機上睇到嘅一片雲海，好靚。

最近每次搭飛機都自不然會唸起一首歌 - 不眠飛行

三萬呎高　困在機艙　足三萬呎高
我睡不好　小別太多　思念太早
靠著氣流　滑翔跳舞　突然疑慮到
這機身似夜半的飛蟻　霎時迷路
直到空姐說　可要被鋪

合上眼睛數啊數　數啊數
並無一隻綿羊跳得比你高　比你好
夢到獅子將你帶走怎算好
你這麼好　數到2047 還未夠數

期望

每個人對生命都有唔同嘅期望，有啲喺為咗自己，有啲喺為咗滿足別人。但喺從來冇人可以保證，呢啲期望可以時達成。如果期望真喺無法達成嘅話，咁喺咪仲應該堅持落去呢？

期望喺唯一能夠醫治苦難嘅藥物，當你悲傷嘅時候，期望就好似一首能夠安撫傷痛嘅音樂。能夠達成期望當然喺開心嘅事，但有時候我哋嘅期望會違背咗其他人嘅願望，難面就要作出取捨。放棄邊個期望都要付出代價，但係除咗自己冇人可以話畀你知應該點揀。

有啲期望可能唔關自己事，更加唔明白點解有啲人甚至願意犧牲性命，都要追求一啲唔會有結果嘅期望。但若用心感受，你就會學識，每個期望或輕或重都喺值得尊重。但係無論期望帶畀你安慰、快樂定喺傷心，能夠期望與被期望都喺幸福嘅事，因爲我哋仲生存緊。

就算幾多個期望落空，我哋都可以有新嘅期望，直至生命嘅最後一刻。