呼吸需要

照顧老人起居飲食確實唔喺一件易事，有時絞盡腦汁卻換嚟一句唔肚餓，咁就擱置。時刻要提高警覺，注意𠳔身體有任何變化，失足跌倒就不可收拾。

不過呢一切都唔及一個非常難熬嘅行經，就喺清晨4-5點起身！！！搞到睡眠質數每況愈下，再咁落去唔喺辨法。難道真喺要出動到安眠藥？

講老實真心唔想活到咁大年紀，冇能力自顧行動不便之餘，如果有病痛就仲麻煩兼頭痛。睇住身邊嘅朋友親人一個一個咁走，自己留喺度為咗啲乜？每日重複起身食飯瞓覺，為嘅只喺呼吸，仲可以做咩？

（唔喺要投訴啲乜，純粹只想喺度發洩吓情緒啫）

成長

好多嘢無論時間過咗幾耐，都唔會從腦海中消失，永遠都會留喺記憶中。隨住年紀逐漸增長，發生喺自己身上嘅事情亦逐漸繁複。

有啲事情以前一直都以爲喺“大人”至會去做嘅，今時今日好自然咁落喺自己身上。突然間要落好多決定，當中冇人會從旁勸導或指點，一切都由自己去取決，自己去負責。
無形中好似感覺突然長大咗，好多嘢唔可以話想點就點，這就是所謂嘅“大人”。。。 。。。

瘋了、累了、痛了、笑了、叫了、走了

還記得以前每隔一段時間，湊夠大約18-19首歌曲就會拿去唱片鋪到錄歌。有啲歌太長仲要絞盡腦汁唸要揀飛邊首歌，然後就不斷咁打點話去查詢進度，一好咗就第一時間奔往去拿帶。可能以前聼得歌多，慢慢就養成對音樂觸覺特別敏感，一旦聽到有一粒音唔喺咁順，都會好容易被發覺。

通常我都會因應唔同嘅情緒而選擇聼邊一位女歌手嘅歌曲； 例如:

• 心情煩躁到極點嘅時候，我會聼莎莉嘅歌
• 心情好有mood嘅時候，我會聼王菲嘅歌
• 心情好靚開心嘅時候，我會聼憶蓮嘅歌
• 心情好攰眼瞓嘅時候，我會聼鄺美人嘅歌

呢一刻 嘅心情我想聼阿菲嘅致青春

一線之差

好多所為嘅有錢人都會買大屋坐靚車； 不過因為生活繁忙應酬多，留喺屋企嘅時間少之又少；自己揸車更加可以講喺機會渺茫。

因此間屋幾大都喺買嚟俾工人住，房車幾舒服都喺買嚟俾司機揸嚟載工人去買餸，接仔女返學放學。

呢個年代似乎做工人都幾唔錯，有大屋住又有靚車坐，仲有司機管接送，何樂而不爲。

通病

發覺愈來愈多人機不離手，連同人交談中都一直喺度篤篤篤。究竟知唔知乜嘢叫禮貌同尊重？

既然咁唔想講嘢，倒不如唔好約見面，直接互通訊息了事，咪一了百了囉。

當遇到呢種人我會不發言，拿出耳筒全程聽歌，就算對方想交談我都會當𠳔透明，十問十唔回應。你可以篤電話我唔可以聽歌咩？

呢招一出對方通常都會醒目將電話收起。以其人之道還治其人之身就喺咁解啦。