紅茶館

趁有四日假期又唔洗拿年假，終于嚟到呢道食件蛋糕嘆返杯下午茶。


人愈大追求嘅嘢就愈簡單

一本書，一杯茶，一件英式鬆餅，一個下午。

戀愛中的城市

睇到呢段預告片，令我有種想家嘅感覺。北海道~"I'll Be Back"!!!

回憶是紅色天空

屋企部腦愈嚟愈少空間儲存檔案，於是翻一翻裏面啲文件夾，結果發現大量從2011至2015年嘅照片同錄影檔案。因爲一直推辭，裏面啲相日復日，年復年咁堆積咗五年。睇嚟喺時候要立定決心做過打掃除，逐一將佢哋歸類同制成影片，做個了斷。

下半年嘅目標，12月31日前一定要完成，Fighting!

伊藤久由衛門

 

突然間非常懷念宇治伊藤久由衛門總店裏面一系列嘅抹茶甜品同小點。嗰一股濃郁嘅抹茶香味，至今依然令人難以忘懷。

如果有機會再重游京都，一定要揀宇治呢個抹茶原產地留宿； 慢慢咁去一一品嘗所有啲抹茶產品，實行有殺錯冇放過。

離開橄欖樹，來到菩提樹

4月兩篇，5月一篇，恐防6月破紀錄連一篇都冇，所以今日就喺咁已發篇文上嚟，撐撐場先。


上個禮拜去咗香港一趟，整個行程只有一個字形容：熱。從相中睇到藍藍嘅天空，就可以想象到當時氣溫有幾高； 熱日當空下喺戶外行足大半日，真喺難以想象自己嗰一股毅力同堅持。

慈山寺除咗嗰座雄偉嘅觀音菩薩像之外，就要數大雄寶殿前嗰四棵菩提樹最爲吸引。 因爲每個人心中都會有一棵自己一手栽種嘅菩提樹； 長得茂盛與否就只有自己最清楚。

反效果

語音留言都已經夠煩，仲搞埋電話通訊。所有來電本人一概都唔會接聽，每個月得3GB數據，仿似戒毒癮一樣難熬，再接埋電話條數咪好襟計？

祈求有朝一日可以閂咗個語音同埋電話功能，咁就天下太平落得清閒。

無論你打一千一萬次都只會徒勞，有事請短訓，多謝合作。

禮儀廉恥

究竟仲有幾多個人懂得乜嘢喺禮讓？家陣啲人乜都要爭，乜都要搶？做乜啫？等下一位會死人咩？讓吓人會天崩地裂咩？畀你爭到搶到咗又會點？會飛咩？

禮讓就好似天山雪蓮一樣，變得遙不可及。

人類=可悲

金嘆與車恩尚

最近被佢哋兩個搞到到啲時間顛倒曬，原因就喺我依然保持一顆赤子之心。

醒吓啦

當大部份人都覺得佢喺一位偉人，好惋惜佢嘅離開嘅時候； 我反而喺心中盤旋，需要咁做咩？做得如此明顯，背後冇其他因素存在？你哋真喺會相信架？

喺我睇得太過深入抑或你哋過份天真呢？你哋會唔會做多咗啊？

奥飛騨温泉郷

嚟日本當然要浸温泉啦，今次呢個喺海拔1283米處，
奧飛彈溫泉鄉中最古老，歷史最悠久嘅平湯溫泉。

眼前雪景猶如仙境般疑幻似真，此時此刻將永遠留喺腦海入面。

選擇呢間酒店除咗價錢適中之外，當然就喺被佢哋呢個露天風呂所吸引。

喺漫天飄雪零下?度下浸温泉，可謂人生一大樂事。
一個人獨自喺度沉澱，即使有幾多煩惱，瞬間亦會變得寧靜平和。

最美麗的第“六”天

一直都好想過年去旅行，今年喺無心插柳下完成咗呢個多年嚟嘅心願。

其實想像同現實喺兩回事，一邊要籌備過年所有零零碎碎事情，另一邊要計劃好行程時間表等； 所有嘢堆曬喺一齊，每晚攰到一上床就即刻瞓着。

2008年因爲凌加恩認識高山呢個地方，結果終于可以如願以償，能夠親身去到拍攝場地親歷其境，感覺就好似發夢一樣。

感謝上天嘅眷顧，讓我哋今趟整個旅程順利到達所有原定計劃好想去嘅地方。喺屋企咁嘅情況下，容許我可以再任性多一次。

感恩的心 感謝有你 伴我一生　讓我有勇氣作我自己
感恩的心 感謝命運 花開花落　我一樣會珍惜

伊藤久右衛門

雲雲宇治綠茶當中，唯獨鍾愛呢個品牌，無法自拔。

廉價航空

唔記得由幾時開始對廉價航空大打節扣，對佢哋嘅印象亦每況愈下。其中最令我心死就喺寄艙行李，買機票嘅時候標榜住有幾平有幾抵，到咗購買行李嘅時候就打開殺價，好冇專業操守囖。

不過最令人懷疑嘅就喺機師嘅專業資格，尤其喺繁忙時間或誤時嘅情況下； 莫講話檢查冇完成架機就即刻起飛，就連啲機組人員未點好人數就落閘放狗，話曬都喺百幾二百條人命，可唔可以認真啲啊！ 唔喺一個平字就乜都唔洗做喺嘛？！

最後就喺啲無腦嘅人，講到明起飛降落嘅時候熄電話，點解仲喺有啲腦殘人士，依然當聼唔到喺到篤篤篤。大姐大哥，你不顧自身安危，都唔做拖衰家啦，唔該曬。

博客大賞

每次當我心煩躁嘅時候，就會收到呢份驚喜即時令我心情平復。

連續四年都能夠有幸得到呢個獨一無二嘅自製CD，

除咗感到窩心之外，亦證明人間依然有情。

衷心一句~多謝你。

盼三年

感恩大賞

魚生

今年可謂一波未平一波又起，因此連撈生都冇興致。
年30第二撈 （第一撈因爲太餓，結果忘記影低）

年初二第三撈，亦為今年最後一撈，少得可憐。

初七仁日第四撈，人在高山沙律當魚生撈 （咁都算撈生褂）。

食得其所

屋企一直都有一個習俗，就喺每年初一都會食齋。
因爲媽媽年事已高，呢個任務好自然咁就落喺我身上啦。
今年嘅南乳齋味道唔錯，好快就被掃得一乾二淨。

另外就喺呢個吾淑吾食推薦嘅蘋果陳皮湯，
甘甜得嚟又相當滋潤，最啱就喺大魚大肉之後整返碗；
最起碼心靈上感覺平衡啲，罪惡感都少啲。

生日快樂

四十嵗生辰，百感交集，思緒萬千。

2015年羊年風水佈局

方海閱2015風水佈局

傻女

呢個版本嘅傻女，簡直令人喘唔過氣；
聼到最後10秒，我已經忍唔住： 嘩哈哈哈哈哈哈~~~
好嘢！

見面禮

2015年頭就送咗份大禮過嚟； 病咗成個禮拜。到咗今時今日依然冇乜胃口，精神依然恍惚，終日魂游太虛，都唔知自己到底做緊乜。

喺啲咳藥水太勁抑或喺抗生素過強呢？已經唔想去尋求箇中原因，一心只喺想快啲康復，過返啲正常生活。

人老咗就真喺要認命.... ....

不要害怕

死亡喺人生必經，當我哋真正認識佢了解佢嘅時候，其實無須過於害怕。一切冥冥中自有安排，既來之則安之。

親人離開我哋，傷心喺必然，畢竟我哋都喺凡人。 將所有情緒發洩曬出嚟之後，就喺時候收拾心情，繼續我哋嘅人生，好好咁活在當下，珍惜身邊依然陪伴緊自己嘅家人，朋友。

因爲，活著就是完全無可比的精彩。

謝謝你的愛

 

估唔2014年最後一日都仲會有驚喜，真喺唔知道要講啲乜嚟表達心中嘅激動。

究竟有幾多年冇真真實實咁打開一張賀卡，賞心細讀裏面嘅每一粒字？！

衷心感謝[SK/0617]™越洋送嚟嘅祝福，好比千言萬語。

多謝2014年帶畀我嘅一切，完夢嘅感動非三言兩語能夠表達，擁有幸福之餘亦要懂得去珍惜。

共勉之！

雪上加霜

年尾流流，浸水土崩都未夠，仲要搞單大禍嘢。今年究竟犯咗啲乜？又喺空難，爲何這樣？！

聖誕禮物

以下列出10大最唔想收到嘅“所謂”聖誕禮物：

1. 朱古力
2. 杯墊
3. 杯蓋
4. 杯
5. 相架
6. 書
7. 即溶咖啡
8. 朱古力
9. 朱古力
10. 朱古力

跪求唔好再送朱古力好嗎？唔該曬！

搵返童年回憶

“聲音、歌聲是用來讚美的，讚美一切； 在宗教裏面是沒有國度，各宗教有其互通的部分； 歌聲是沒有分別心。” 無論喺邊個宗教，本質就應該喺勸人向善，而非打著宗教嘅名義，去滿足自己嘅慾望，或者排擠自己唔認同嘅人。

上個禮拜睇咗一場冇和音、冇舞蹈員、冇誇張嘅舞台設計效果、冇華麗嘅服装造型 （由頭到尾得一件衫），冇特别嘉賓； 一個簡單以純音樂同天籟嘅歌聲，以最真诚感恩嘅心帶領所有觀衆返到昔日回憶裏面。 一場神級嘅演出，深深被佢嘅歌聲感動，一首又一首昔日童年嘅民謠，仿佛時光倒流回到當年無憂無慮嘅日子。

音樂可以檫試靈性。。。人生是一場長智慧，等待覺悟的過程。” 知世如夢無所求，無所求心普空寂，還似夢中隨夢境，成就河沙夢功德。

萬千星煇頒獎典禮2014 - 賽果公佈

最佳劇集：使徒行者 （中）
最佳男主角：郭晉安 – 忠奸人 （最後一分鐘賽前預測，睇漏咗）
最佳女主角：佘詩曼 – 使徒行者 （中）
最佳男配角：蔣志光 – 老表，你好hea！（其實佢都唔錯）
最佳女配角：何超儀 – 再戰明天 （冇睇，所以冇揀佢）
最受歡迎電視男角色：覃歡喜（許紹雄飾） – 使徒行者 （中）
最受歡迎電視女角色：丁小嘉（佘詩曼飾） – 使徒行者 （中）
最受歡迎劇集歌曲：越難越愛 -「使徒行者」片尾曲，主唱：吳若希 （中）
飛躍進步男藝員：張繼聰（《食為奴》《忠奸人》《老表，你好hea！》《超級巨聲4》） （Mariao確實幾出）
飛躍進步女藝員：黃翠如（《舌劍上的公堂》《愛我請留言》《快樂聯盟》《走過足球聖地》《我係小廚神》） （中）
最佳節目主持：薛家燕、王祖藍 – Sunday扮嘢王 （失測）
最佳綜藝節目：Sunday扮嘢王 （中）
最佳資訊節目：守護生命的故事2
最佳特備節目：愛情來的時候 （中）
專業演員大獎：朱維德、蘇恩慈、李家鼎、羅樂林、蔣志光 （個人幾中意呢各獎，起碼唔喺死咗至嚟追頒）
萬千光輝演藝人大獎：譚炳文 （好耐冇見）

萬千星煇頒獎典禮2014 - 賽前預測

最後一分鐘嚟預測，睇吓會有幾成准嘞。

最佳男主角： 陳展鵬（叛逃）
最佳女主角： 佘詩曼（使徒行者）
我最喜愛的電視男角色: 許紹雄（覃歡喜-使徒行者）
我最喜愛的電視女角色: 佘詩曼（丁小嘉-使徒行者）
最佳男配角： 曹永廉（名門暗戰）
最佳女配角： 陳敏之（使徒行者）
飛躍進步男藝員： 洪永城（《單戀雙城》《愛我請留言》《載得有情人》《走過足球聖地》）
飛躍進步女藝員： 黃翠如（《舌劍上的公堂》《愛我請留言》《快樂聯盟》《走過足球聖地》《我係小廚神》）
最佳劇集： 使徒行者
最佳節目主持： 《女皇的盛宴》汪明荃、崔建邦
最佳綜藝節目： Sunday扮嘢王
最佳資訊節目： 香港人漂流記
最佳特備節目: 愛情來的時候
最受歡迎劇集歌曲: 越難越愛 -「使徒行者」片尾曲-主唱：吳若希

幾時再見

2014年可以講喺咁多年以嚟最少博文嘅一年，全因宮務實在太繁忙，有時甚至連飲水嘅時間都冇。究竟呢中生活要涯到幾時？

前面天蒼蒼白茫茫，前面乜嘢都睇唔到~~~

宮中人心惶惶，唯一可以做嘅就喺祈求神明保佑，

一切始終都會過去的。

長恨歌

某日聼電台講到一個話題 ： “假如可以返到以前，你最希望能夠做一樣咩嘢嚟彌補一直以嚟嘅遺憾。”

如果可以從嚟嘅話，我希望可以再努力啲，比多啲心機讀書； 日後就唔洗好似依家咁每日忍氣吞神，行屍走肉過日子。

“百川東到海，何時複西歸。少壯不努力，老大徒傷悲。”

呢句詩詞一直都知道點解，不過真喺要到咗呢個年紀，正深深咁明白到真正涵義喺幾咁附有人生哲理。

金の湯

嚟到神戶唔一定食牛柳 （其實因爲信仰關係，冇食牛肉習慣），

仲可以到有馬一邊賞楓一邊浸返個露天溫泉。

今次揀咗日帰りプラン配套，

包食一餐+露天風呂+按摩+休息室免費設施； 

簡直喺超值！

餐後到9樓展望大浴苑享用金泉、銀泉露天風呂之餘，

仲包埋B2階大浴場嘅季の湯。

與天然環境融為一體嘅呢種感覺，唯獨只有日本做得到。

京都寺廟

到京都自由行，入得最多嘅當然喺啲乜寺乜寺，世界遺產之類。
當中要數金閣寺嘅入門卷最爲搶眼，十足十一道治鬼靈符。
奈良東大寺何其壯觀，裏面嘅大佛像有氣勢之於兼十分莊嚴。
清水寺可能被到訪過嘅遊人過於汎濫，因此變得極度商業化。
大覺寺少咗外國遊客，多咗好多本土人參拜，感覺欣然道地。
高台寺湖上靜止嘅楓葉倒影，竹林裏面嘅禪意，帶嚟驚喜。
八坂神社夜燈挑起純粹路過，裏面吊掛嘅燈籠增添幾分神秘。
伏見稻荷大社最為方便，聞名世界嘅千本鳥居，名不虛傳。

秋.日.悠遊

自己一手一腳編排嘅行程，完全做到隨心隨行，

京阪秋.日.悠遊，完夢！

多事之秋

年尾十一月，自從blogger.com被宮牆隔絕之後，今年嘅post就隨即大量減產向下滑落，連100都無法衝出，實在慚愧。

加上宮務繁忙，每晚返到屋企經已9點幾，仲點會有動力去打開部腦，有時甚至沖完涼打開冷氣就瞓，乜都唔想再做。

不過我依然唔會放棄，只不過轉換另一個唔同嘅形式去發文。畢竟人始終需要一個屬於自己嘅空間去發洩，盡量將自己無論身同心都能夠取得一個平衡點。

環保意識去咗邊？

好好地一顆老榕樹，一夜之間連根拔起，無聲無息咁消失於眼前。眼見如此情景，心裏面非常心痛。喺唔喺覺得空氣質數太過好，唔再需要太多植物。

放且我哋嘅好鄰居每年到時到候必會關照大家，勢必將整個鋼筋森林彌漫著一陣朦朧嘅浪漫氣氛。無形中亦有助本地振興經濟發展； 一個二個呼吸系統都變得愈嚟愈敏感，自然就會多咗去光顧醫生，診所多咗生意，葯厰亦會提高生産，連鎖效應之下經濟自然就會更加蓬勃。

真喺多謝曬！

謠言止於智者

能夠親耳聽到海豚聲喺現場回蕩，簡直就如置身於大海中暢泳。擁有如此曠濶嘅音域，試問現今樂壇有幾多位歌手仲能夠做到？

真心唔明白啲人仲想要啲乜？究竟仲識唔識“珍惜”呢兩個字嘅涵義？

喜怒哀樂

喺呢個深宮裏面，控制自己嘅情緒喺一個好大嘅一門學問。

要做到喜怒不形於色，就要切記令娘娘以你嘅喜愛為喜愛，以你嘅厭惡為厭惡~~~

感激再感激

又再收到師兄越洋送嚟厚禮，
除咗覺得佢非常有心思之餘，
打開嗰一刻的確好窩心，
感覺完美。

再一次喺度多謝你。
“你使我的疲倦人生呼吸氧氣
你使我的流浪時光終於變做合理
那怕到處笑面如做戲　過了算了不必記
你卻再次使我對這生好奇”

好在一個人

好耐都冇一個人留喺空無一人嘅“家”中，感覺開心自在。 一個人其實真喺好舒服，無需要兼顧其他人，中意做乜都得，去邊度都得。

有人曾經話過一個人耐咗，會上癮。 聼佢講除咗工作上必須接觸嘅人外，其餘時間都喺一個人過，食飯、睇戲、旅行一個人就是常識吧！疏堂親戚只會有紅白二事先會打搞。做咗咁多年人一定遇過有啲人有心同佢做朋友，但去到一個點佢就會fade out。 而佢喺絕對享受呢種生活，所以佢非常之認同一個人耐咗，會上癮。

而我又未至於去到咁獨，只不過生活得太攰，好想停落嚟吸一下呢種寂寞。

撐起雨傘

過去一個星期幾乎每個小時都緊貼住即時新聞、社交網站、學聯專業嘅不停更新。鏡頭下嘅每一位勇士不懼風雨，不畏強權，日以繼夜留守街頭，目的只有一個 - 自由！

無論受到幾多打壓，無論現實幾咁黑暗，無論有幾多反對嘅聲音，無論最後結果會喺點，都要認認真真咁去企出嚟，話畀全世界知民主永遠不枯也不散。

撐住！！！

18禁

好撚火滾，條八婆為咗少少事喺度搞場大龍鳳。自己講過嘅嘢可以完全推翻曬，理直氣壯當冇講過一樣。個個喺前面救火，佢竟然喺後欄放火，仲要加柴燒到轟轟烈烈； 然後就跑出嚟大吵大鬧，好似個癲婆一樣嗌火燭，裘其屈個替死鬼做兇手。

點解咁多人生癌，偏偏未輪到條八婆？ 鬼唔望你畀十只生滋狗公輪； 然後乳癌、大腸癌、淋巴癌、胃癌、肝癌、鼻癌、腦癌， 統統癌症一個個接住嚟，慢慢折磨又唔死得個只！！！

老作狗噏你老母西都算第一咯，去含撚啦你！！！

各安天命

星期五最後一分鐘都唔會畀你過一個安樂嘅周末，惟有聼聼秀英昔日笛奏，一解心中鬱結。

愛瘋了

呢兩日一直忙住玩生果最新推出嘅操作系統，又要忙住更生其他有關裝置。隨著第六代嘅推出，科技又再展開嶄新一頁。

其中最令我感到驚喜就係當有來電嘅時候，所有同一系列嘅生果產品都會一齊響起。換句話講只要其他裝置使用相同嘅Wi-Fi 網路，都可以係任何一個裝置上接聽來電或者撥打電話，實在太神奇了。

除此之外得力助手Siri亦有驚喜，當聽到音樂嘅時候就會辨識到首歌名同邊個唱嘅。呢位得力助手似乎越來越洞悉到主人嘅心意，變得更加貼心。

九月天高人浮躁

返到金寳唔食老鼠粉、炸料，怡保唔食咖哩面、加央糯米飯簡喺對唔住自己。

奇峰豆漿、街頭壁畫處處、二奶巷古老當時興，但喺對我而言似乎冇乜感覺。

務邊沉香山茶園反而畀我哋一份新鮮感，因爲平日關係人流稀少，成座沉香山好似畀我哋包場一樣。仲有專車接送兼夾免費導遊講解，令到我哋感到全程舒適兼自在。一次令人難以忘懷嘅沉香遊，值得一行。

菲經

估唔到今時今日仲有幸聽到呢個版本，感謝神！

告別

估唔到上一篇遺棄的聲音竟然成為絕響，淪為宮中最後一篇網誌。即此亦意會著日後宮中嘅生活更加艱辛難熬，完全地與世隔絕。

不過人嘅生命就如小強般頑強，永遠都喺打不死嘅。此處不留人自有留人處，唯有另覓其他方法，繼續透過呢度盡情發洩。

遺棄的聲音

發覺最近三色台啲劇有一個共同點，就喺同一劇同一班演員開拍另一套劇； 又或者從中調配幾位演員加多減少，然後就開拍另一套劇。啲劇情就千篇一律毫無新意可言。以前啲劇集劇情非常緊湊，要不斷咁追； 然而家陣啲膠劇睇完一集就已經要按停，完全冇曬衝動要繼續追睇劇情。

另外就喺啲劇集不停開拍續集，而且演員來來去去都喺嗰幾位，好鬼死悶氣。劇集毫無新意之餘就連啲綜藝術節目都不斷返炒； 單單數旅遊節目“走過”已經數唔清返炒咗幾多嗰系列。

難怪愈嚟愈多人捨棄港劇，漸漸遺棄呢個免費嘅電視台。

不停往前

我承認我唔夠恆心，擱置已久嘅承諾到咗呢一刻都依然停步不前。

換作喺以前嘅我，一早就已經付諸行動。

點解會搞成咁，因爲我真喺老咗、懶咗、hea咗。

認人

認人叻嘅人通常都會喺一位成功人士。我自問認人唔叻，有時仲會旁若無人置身于自己世界裏面。一直都冇呢個習慣當行街或者喺公衆場所嘅時候，去留意身邊行人嘅臉孔，然後遇到熟人嘅時候特登走上去搭訕。有時甚至會睇到熟悉臉孔會掉頭走，因爲唔想去應酬，講啲跟本同廢話冇分別嘅嘢。

咁做喺唔喺有點兒所謂嘅獨啊?

不過我並唔喺嗰種冇警覺性，身邊行過啲咩人都懵然不知； 而喺唔會去特別留意對方嘅一舉一動，有啲人甚至連旁人講緊啲乜都去聼。其實我覺得呢種舉動並唔喺乜嘢留心身邊發生緊啲咩，而喺八卦嘅舉動多於一切囖。點啫？一個三唔識七嘅陌生人同朋友講緊嘢，點解要去留心聼人哋嘅對話内容啫？

咁樣喺唔喺有點兒做多咗呢？

陰影

可能經歷過嗰種有口難言嘅感覺，過咗咁多年之後我都依然對嗰次發生嘅一切耿耿於懷，始終冇辦法淡忘。亦因爲如此，每次都會對同行嘅同伴多咗一絲懷疑，恐怕會歷史重演。

唔想因爲心軟，再次畀自己重蹈覆轍，犯下同樣嘅錯誤； 所以唔好再對我有任何期望。隨便你話我絕情、不近人情、反轉豬肚、難以相處，我亦唔會去作任何解釋。因爲...我已經好攰，嗰心好淡。

靜音

如果冇記錯，應該從2008年開始，我部手機就設定去靜音功能直至現在。有成6年都冇響過囖，電話鈴聲喺邊首歌都幾乎忘記咗。

箇中原因當然喺要數當年嘅奪命追Call，不斷咁被纏繞咗大半年，最後選擇將佢設為靜音； 從此無論任何時候佢就冇再響過嘞。

最近發現講電話嘅人亦愈嚟愈少，所以喺公衆場所都好少會聼到電話鈴聲。然而，換上嘅聲音就喺信息提示； 人與人之間少咗用言語去溝通，就連講一句Hello都懶得去回應。

茫然靜待

兩個人就算幾咁親近，曾經水乳交融過，都唔代表會了解對方。當中依然會存在著猜疑、顧慮、矛盾、忐忑等等等等不安。

人與人之間只有信任正可以衝破一切障礙，繼續喺一齊。信任一旦失去咗，再做啲乜嘢都只會喺徒然。

夢飛翔

做人如果冇夢想，同條鹹魚冇咩分別呀？呢個星爺金句講得非常貼切，人一定要有夢想，有夢想至會有動力，有動力至會有生存價值，有生存價值至會繼續做人，做好每件事，活著就是完全無可比的精彩。

正所謂一人有一個夢想，無論生活幾咁困難，都要搵到自己嘅夢想； 一切就會隨著自己夢想為目標，所有難題都會迎刃而解。

八婆

當一個八婆成爲衆所周知嘅八婆，佢就已經喺一個徹徹底底嘅八婆； 個個對佢聞風喪膽，避之則吉。

對付呢種八婆，喺前無退路後有追兵嘅關鍵時刻，就不得不去泰國一趟。誠心祈求得道高僧賜個小頑童返嚟，好好咁同佢玩個痛快。

喺兩敗俱傷嘅情況下，一拍兩散。呢啲就喺叫做絕處逢生嘞！！！

自救

當一個人得到情緒病，最關鍵嘅人就只有自己。甚麽身邊人關懷，枕邊人體貼，朋友家人關心統統都只喺次要，最最最最主要就喺病人能夠接受自己有情緒病，而且面對自己病情去接受適當治療。

假如當事人一直執迷不悟，一直鑽牛角尖，任何人都冇可能幫到佢。

慾望就是一種虛空的苦痛

三年前搬到嚟羅湖，第一次同屋共主一屋簷下，不經不覺咁連生活習慣隨著環境變化而改變咗。

路途遙遠之餘，為咗能夠爭取到充足嘅睡眠時間； 最近發覺近呢兩年嚟，晚上十點左右就開始準備就寢。相信對好多人嚟講，十點鐘正是黃金時間，咁早瞓未免有點兒浪費。但喺為咗唔想每日清晨時份被嘈雜嘅噪音吵醒； 唯一嘅選擇就只有早睡早起。

正正因爲呢個原因，生理時鐘喺周末或者假期嘅時候，都會定時定候咁呼喚。

瞓到踏八已經喺那麽遙遠嘅奢侈慾望... ...

適者生存

差唔多有成4-5年做得好地地，，無拉拉話將手頭上嘅嘢移交畀另一個新手，而且仲喺即時生效嗰只； 嗰腦究竟唸乜架？

口頭上話喺畀機會所有人能夠喺各領域都能夠學到嘢之餘，亦可以清楚了解各部門嘅運作。但喺有冇唸過接手嗰個會好混亂架？到咗1-2年後稍爲上手咗，又話要換人； 周不時咁換人，最後搞到人心惶惶，都唔清楚自己究竟喺咩崗位。

呢啲就喺叫做手段，娘娘背後真正要嘅就喺將后宮搞到天翻地覆，愈亂就愈對佢有利。娘娘“悉心”鋪排嘅用意，又會有幾多人能夠真正領領略得到呢？

默哀

獨食困難症

發覺好多人都患上獨食困難症，每次食嘢都要搵人陪。有人話一個人食嘢感覺好淒涼，嗰種一個人嘅孤單非常難受兼落寞。

其實一個人食嘢有乜問題呢？想幾點去幾點走都有自己決定，想食乜就食乜； 何必搞到咁大龍鳳啫？放且我真喺非常討厭食嘢，假如人類喺唔會感覺餓，咁對我而言食嘢根本就喺多此一舉。

直到呢一刻爲止，依然非常享受一個人獨處嘅時候。

人靠衣裝

今時今日穿著對好多人嚟講，完全冇咗一個審美嘅概念。唔信，咁你可以周末行上街，就會領悟得道我所講嘅喺屬實。

靚與唔靚真喺咁難去辨別？究竟你哋知唔知道咩叫做先敬羅衣後敬人? 到咗咩年齡就要有咩打扮咩衣著，難道當你去照鏡嗰時後，唔會被鏡入面嘅自己嚇親嘅咩?!

愛我請留言

當你覺得對方開始好煩嘅時候，你嘅電話就會陸續出現好多“未接來電”； 緊接著就會喺訊息轟炸。其實對方又點會察覺唔到你開始敷衍緊佢吖，只喺佢唔甘心被敷衍被忽略，因此至會有以上過激嘅異常行爲。

呢類人統統都會被我打入冷宮，你愈轟炸我就愈反感。凡事要點到即止，點解要做到令人感覺討厭至肯停呢？

“信任就似一張紙，皺咗，就算把佢攤平，亦唔會變回原本嘅樣子。信任與承諾喺一對的”

醒醒

甚麽公議，甚麽公平，甚麽公正，甚麽良心統統都喺假嘅； 呢個世界永遠唔會有公議/公平/公正/良心可言。邊一個得勢就邊一個話事，呢個就喺鐵一般嘅事實。

為咗阻礙最新臭屎公諸於世，竟然不擇手段。接二連三扮黑客入侵都不特止，今日竟然連一個post都冇。冇錯，咁大件事竟然一個post都冇，究竟喺統統被河蟹，抑或喺大家都學聰明唔再上載去呢個虛僞嘅平台呢？

心知肚明！

愛回家

儲存喺手指裏面差唔多有成年，
昨日心血來潮獨自一人留喺房裏面，
靜靜咁去細味呢齣感動全日本嘅電影。

 

劇情冇大起大落，故事亦平平淡淡；

但喺偏偏令到睇戲嘅觀衆，眼淚不自禁咁從眼角流下。

整齣戲根本就喺描述緊你同我嘅生活寫照，唔可以話悲慘，因爲現實就喺如此。我哋總被忙碌嘅都市生活追著跑，你有幾耐沒回家好好陪伴兩老嘞？

On way 36小時

由南至北再由北返到南，中間逗留唔夠20個鐘頭。
時間長短完全不受影響，目標非常清晰。

點解？
有陣時好多嘢喺唔需要原因，亦無需去追究因由。

四樓有四仔

還記得相當年興旺時期，整棟大廈人流不斷，水洩不通。2手CD鋪，明星相店，遊戲機鋪，漫畫店舖，高達模型、日本雜誌、四仔天堂，如今統統都已經成爲咗集體回憶。

前日嘅白皮書更加可以預料，『聯合聲明完嘞！一國兩制完嘞！基本法完嘞！』 一切都完嘞。

四樓有四仔，四仔無格仔。男女都啱睇，睇完大個仔... ... ...

大熱像赤道重疊

呢幾日最令人煩躁嘅莫過於嗰粒殺人於無形嘅火球。 中午時分好似想將一切世間萬物融化曬，到咗夜晚就化身為一部燒烤爐。啲熱力就好似哥哥首歌一樣“大熱像赤道重疊，命運註定若離別； 世界快將有浩劫，殞石最終碰撞磨滅！”

據知炎熱天氣受一股熱帶氣旋影響，將會持續到九月！幾日都咁痛苦囖，仲要捱到九月？！后羿叔叔，唔洗手下留情，拉開你嘅神弓，將剩低落嚟嗰粒都射埋落嚟，唔好再畀佢搞到莊稼枯死，民不聊生。

痛楚循環

1. 休息-工作-休息-工作-休息-工作-休息-工作-休息-工作-休息-工作
2. 傷風-發燒-咳嗽-康復-傷風-發燒-咳嗽-康復-傷風-發燒-咳嗽-康復
3. 姑姑-娘娘-公公-姑姑-娘娘-公公-姑姑-娘娘-公公-姑姑-娘娘-公公
4. 糧頭-糧中-糧尾-糧頭-糧中-糧尾-糧頭-糧中-糧尾-糧頭-糧中-糧尾
5. 房租-借款-家用-房租-借款-家用-房租-借款-家用-房租-借款-家用

撞邪

條八婆自從強勢回歸之後就冇日安寧； 未開工就撥手提電話, 催三催四。10個鐘入面收到8-10個來電，至於電郵當然喺多到我都唔想去數。成日就咁畀佢玩嚟玩去，一件小小嘅事硬係要化到大大大!

真喺好想大聲嗌佢一聲死八婆, 然後狠狠咁伸腳佢死!

寧可信其有

由細到大接觸呢方面嘅資訊都比較貧乏，因此亦唔會特別迷信或者沉迷於呢個話題上。不過身邊就有大把對呢方面非常感興趣嘅人存在，有啲甚至可以講話已經走火入魔，完全不能自拔。

喺度想分享小小嘅冷知識，當你感到害怕嘅時候就千奇唔好念經或者播放啲甚麽念佛機。因爲當佢哋聼到經文，就會覺得好舒服好超脫（經文主要就喺發揮超度嘅作用），最後只會愈聚愈多，弄巧反拙。

相由心生

有心人遠渡從西藏寄嚟嘅心意卡，非常感激。

心地喺相貌嘅根本，審察一個人嘅心地，就可以瞭解他嘅善惡之性；行為喺心性嘅外在表現，觀察一個人嘅行為，就可以知道他嘅禍福吉凶。

寫真集

隨著時代嘅變遷，由從前菲菻相機演變到數碼相機，由相片變到電腦檔案。最近興起將數碼相片打印成一本書籍，呢個玩意兒相當實用，慳時兼慳位。相信日後將會逐漸減少沖洗相片，將啲旅行相片打印成一本本書，以作收藏。

喺未畀時代巨輪卷走之前，亦唔執輸印返本書嚟自娛一下。

紙質同顔色都令人感覺良好，再加上團購價錢減半，值得一再加印！

萬里尋爸

最近不斷追睇呢個日本真人show - 世界で働くお父さん。

日本人通常都好大男人，亦唔容易表露自己情感，估唔到啲爸爸睇到自己啲兒女都喊晒。每集當啲小朋友要離開爸爸返日本喺入禁區嘅情節，大家依依不捨離愁別緒之際，都會被感動到眼濕濕，非常感人。

健忘

9個月前就要計劃好2015年嘅假期，然後就要當機立斷買機票。呢一個動作已經重復咗有4-5年； 噚晚搞咗成晚就已經洗咗成千蚊，真喺洗錢容易賺錢難。

今朝早突然醒起仲有一張醫療卷未用，結果發現到期日喺13/4/2015。心裏面不斷盤旋要用乜嘢方法去兌現呢張過期卷，打電話去求情？篇一個美麗故事話出國返嚟等等等等。心急如焚之際短訊友人商談如何解決，得返嚟回復喺： “喂，2015到期喔！”

喺喔！2015年到期！！！成晚搜尋2015日期，搞到以爲今年已經2015。呢啲喺唔喺腦退化嘅跡象？好得人驚囉~~~

摩周湖星紀行

川湯溫泉喺一個遠離塵囂嘅世外桃源，

其中一個難忘記經歷就莫過於摩周湖星紀行。

首先當然要醫好五臟六腑先；

由溫泉旅館提供嘅和式美味晚餐。

晚飯過後，旅館安排專車接送前往摩周湖第一展望台觀星。
隨團仲有一位導賞員哥哥講解摩周湖嘅形成。

絕冇花假，一抬頭真喺睇到漫天繁星， 啲星星近到簡直可以束手可及。
可惜嘅喺冇專業嘅攝影器材，無法捕捉到咁震撼嘅星空。
當晚亦破咗一項個人紀錄，錄得最低氣溫-20度！
此情此景將會永遠留喺腦海中，永不磨滅 (除非老人癡呆)。
(以上照片喺從弟子屈なび觀光網度cap返嚟)

大約10點幾返到旅館，第一件事當然就喺去浸溫泉。

一邊漂雪一邊喺露天風呂度浸溫泉。

只可以講一句：日本仔“你哋好嘢”！

題外話：我發覺嗰導賞員哥哥同Rubberband嘅主音6號有70%相似。

獨處

喺可以選擇嘅情況下，我通常都唔會揀公共假期去請年假。因爲呢啲日子，所有可以容納人潮嘅地方都會逼到爆炸。無論喺交通、食肆、商場、所有公共場所甚至連紅綠燈下都會多人都癲。成日就只有等同埋排隊。

對於我呢種唔喜歡熱鬧，唔中意食嘢，唔擅長吹水嘅人嚟講； 喺一般嘅公共假期，我都選擇會留守家中，享受一下難得嘅獨處時刻。我絕對唔會感到孤單，絕對唔會好似某啲人唔知點打發時間，甚至乎一定要搵人去陪食飯。

到呢一刻爲止，我依然享受一個人唔需要任何互動嘅沉澱空間。

即喺天命亦喺人事

果然不出下官所料，六國大封相即將上演。

一向呼風喚雨，喺后宮橫行霸道，冇風起浪嘅娘娘終于被踢出永壽宮。娘娘喺宮中十幾年，搞事就喺佢嘅本事。但喺最終都喺落得如此下場； 呢個就喺印證咗一句説話“啲花靚又點呀，可以開得幾耐?? 就算而家幾鮮艷，都會有花殘粉褪嘅一日，可以留得住正茂芳華咩.........”

如果人世間真喺有所謂嘅因，所謂嘅果。咁公公能夠置之死地而後生，就喺天意。而娘娘一生都要留喺紅墻之内，如今落得滿盤皆落索，就喺命定。

文字騷擾

最近有條友相當怪，啱啱相識嘅時候，發送訊息裏面啲内容都算有紋有路，不過之後就愈嚟愈奇怪。晚上十點都收到佢訊息，有時問食咗飯未？病咗啊，有冇睇醫生啊？有時又會問放咗工未？喺咪好攰啊？要唔要按摩？？？！！！

開始嘅時候或者對新相識嘅朋友有所好奇，問多兩句都算正常。但喺每日幾個信息嚟問三問四，身為一個女仔人家，竟然問一個見面得嗰一兩次嘅人仲要問人要唔要按摩？就算喺開玩笑，會晤會覺得有點兒過咗火位啊？

電話謀殺案對我嚟講經已免疫，對付呢種騷擾當然最好嘅方法就喺置諸不理。

但願佢會領悟到自己已經問多咗，講多咗，做多咗囖！知醜之餘跟住會收手。

凡夫俗子

現今社會信眾爲咗表達有幾咁誠心，就舉辦一場盛大嘅法會。教徒爲咗表達有幾咁虔誠，就籌辦一場座無虛席嘅彌撒。有人為咗表達自己嘅誠意，令到另一半感動，就搞一個大宴親朋嘅盛宴。

究竟喺依家啲人混肴咗究竟乜嘢叫做誠心？虔誠？誠意？抑或大家已經被俗世嘅所謂言論、眼光、盲從； 侵蝕咗個人嘅判斷、智商以及理解能力？

人人都咁做唔一定就啱，人人都去做唔一定就跟，人人都要做唔一定就好。

周末自娛

經過兩個星期嘅特訓，終于成功泡制出一杯正宗起泡嘅抹茶。
非常滿足之餘，對泡抹茶嘅技巧又更上一層樓。

男共女

有冇發覺大部分雄性動物比雌性動物，外觀上一般都比較引人注目啊？

喺咁以就可以例出以下三個例子：

1. 雄獅 vs 雌獅
2. 公鷄 vs 母鷄
3. 雄孔雀 vs 雌孔雀 (原來只有雄性正會孔雀開屏）

似夢如幻

莊周夢蝶，夢蝶莊周，浮生若夢。好多時候唔需要咁刻意去分清真與假，現實或者喺虛幻。呢種先至叫自在，先至叫做放下。

突然間沉醉於呢段詞，亦正正活生生咁描述緊每日日出而作日落而息嘅你同我。

“中秋好月誰受用，剪西風淚雨梧桐，瘦骨闌珊加沉重，听遍天外哀鴻，草際寒蛩，響徹那紙條窗縫，恨悠悠一場大夢。”